Sama da mutane dari da hamsin ne aka kashe a birnin Seoul a lokacin bikin Halloween
Shugaban kasar Koriya ta Kudu Yoon Seok-yeol a ranar Lahadin da ta gabata ya ayyana zaman makoki na kasa bayan turmutsitsin da ya faru a lokacin bukukuwan Halloween inda ya ce abin takaici ne matuka ganin irin wannan bala'i ya afku a tsakiyar birnin Seoul.
Akalla mutane 149 ne suka mutu sakamakon turmutsitsin da ya faru bayan da mutane da dama suka fada cikin wata ‘yar karamar hanya yayin wani biki a birnin Seoul da yammacin ranar Asabar, in ji jami’an agajin gaggawa.
Choi Sung-beom, shugaban tashar kashe gobara ta Yongsan, ya shaidawa manema labarai daga wurin da lamarin ya afku cewa, wasu 150 sun jikkata a hatsarin da ya afku a gundumar Itaewon ta birnin Seoul.
Jami’ai sun ce da yawa daga cikin wadanda suka jikkata na cikin mawuyacin hali kuma suna samun kulawa.
Wannan shi ne bikin Halloween na farko a cikin shekaru uku kuma ya zo bayan da ƙasar ta ɗaga hane-hane na coronavirus da ka'idojin nisantar da jama'a. Yawancin mahalarta bikin sun sanya abin rufe fuska kuma sun yi ado a matsayin alamomin Halloween.