Nadiifinta guriga waxay khatar ku tahay noloshaada, waxayna u dhigantaa inaad cabto labaatan sigaar maalintii

Ma ahan war wanaagsan iyo wax lala yaabo, cilmi baaris dhawaan la sameeyay ayaa ka digtay in nadiifinta guriga ay khatar ku tahay caafimaadka hab-dhiska neefsiga ee haweeneyda, taasoo u dhiganta khatarta ay leedahay cabista 20 # l oo sigaar ah maalintii.
Daraasaddan oo uu natiijadii ka soo baxay wargeyska “Daily Mail” ee dalka Ingiriiska ka soo baxa ayaa tilmaantay in khatarta isticmaalka nadiifiyaha gurigu ay ku kooban tahay dumarka oo keliya, isla markaana aanay haba yaraatee saamayn ku yeelanayn ragga.

Cilmi-baadhayaashu intii ay cilmi-baadhistu socotay waxa ay baadhis iyo qiimayn ku sameeyeen sambabada 6235 qof oo isugu jira rag iyo dumar, iyaga oo dhawr su’aalood ka weydiiyey bal in ay iyagu guryahooda nadiifiyaan ama ay ka shaqeeyaan nadaafadda, iyo inta jeer ee ay isticmaalaan waxyaabaha dareeraha lagu nadiifiyo iyo kuwa lagu buufiyo.

Daraasaddu waxay sheegtay in dumarka guryaha nadiifiya, xitaa toddobaadkiiba hal mar, ay si weyn hoos ugu dhacaan waxtarka sambabada, halka nadaafaddu aanay saamayn ku yeelan caafimaadka ragga.
Qorayaasha cilmi-baadhistan oo ay hoggaaminayaan cilmi-baadhayaal ka socday jaamacadda Norway ee Bergen, ayaa tilmaamay in hoos u dhacan waxtarka sambabada uu la mid yahay marka la cabbo 20 sigaar ah maalintii, iyaga oo carabka ku adkeeyay in nadiifinta guriga ay keeni karto dhaawac weyn oo soo gaara hawo mareenada,maadaama ay xanuujiso xuubka xabkaha ee dadka,waxa ay khatar ku tahay caafimaadka hab-mareenka ee haweenka mustaqbalka fog,maadaama ay u soo bandhigto xanuunada boronkiitada daba-dheeraada, neefta iyo xanuunada kale ee neef-mareenka.
Marka laga hadlayo saamaynta nadaafadda ee labka ah, cilmi-baarayaashu waxay ku macneeyeen in tani ay sabab u tahay xaqiiqda ah in sambabada ragga oo aad u adkaysta waxyeellada ay keento xasaasiyadaha kala duwan, oo ay ku jiraan qiiqa tubaakada iyo boodhka.
Daraasadu waxay kula talisay haweenka inay yareeyaan isticmaalka kiimikooyinka ee hawlaha nadaafadda, gaar ahaan kuwa ay ku jiraan bleaches iyo ammonia waxyeelada leh, iyo inay isticmaalaan biyaha kaliya habka nadiifinta.