Kwabulawa abantu abangaphezu kwekhulu namashumi amahlanu eSeoul ngesikhathi somkhosi we-Halloween
UMengameli waseNingizimu Korea u-Yoon Seok-yeol ngeSonto umemezele isililo sezwe lonke ngemuva kwesibhicongo esenzeke ngesikhathi sokugubha i-Halloween futhi wathi kuyishwa elikhulu ukubona inhlekelele enjalo yenzeka enhliziyweni yeSeoul.
Okungenani bangu-149 abantu abashonile esibhicongweni esenzeka ngemuva kokuthi inqwaba yabantu iwele emzileni omncane ngesikhathi kunomgubho eSeoul ngoMgqibelo kusihlwa, kusho abezimo eziphuthumayo.
UChoi Sung-beom, inhloko yesiteshi somlilo saseYongsan, utshele isithangami sezindaba endaweni yesigameko ukuthi kulimale abanye abangu-150 engozini eyenzeke esifundeni sase-Itaewon eSeoul.
Izikhulu zithe inqwaba yabalimele isesimweni esibucayi futhi bathola ukwelashwa.
Yimigubho yokuqala ye-Halloween eminyakeni emithathu futhi iza ngemuva kokuthi izwe lisuse imikhawulo elwa ne-coronavirus kanye nemithetho yokuncishiswa komphakathi. Abaningi babahlanganyeli emikhosini bebegqoke izifihla-buso futhi begqoke njengezimpawu ze-Halloween.